政情：提早完會唔見影 梁君彥僅短訊通知
今個年度嘅立法會認真多花樣，繼大會設有小休同午膳之後，立法會主席梁君彥早前決定由尋日起，大會由原定晚上八點完會，提早至七點完會。過往佢都會喺會上宣布完會，但尋晚就好反常，冇喺會上宣布完會，只係用短訊通知議員，真係再一次打破常規喇！
話說立法會自從復會後，因為內務委員會一路都未選到正、副主席，喺冇人頂更嘅情況下，梁君彥就要一個人做晒，連食飯同去廁所都冇時間，所以會議就破天荒地增設小休同午膳。
以往會有廣播提示
繼增設小休同午膳後，梁君彥又再次破天荒咁決定提早一粒鐘完會，而喺尋日下晝，適逢有議員提出其他動議，所以佢喺五點幾時決定暫停會議處理。過往立法會喺暫停會議後復會，好多時喺復會前十分鐘，大樓都會有廣播提示，但尋晚去到接近七點，大樓都冇廣播提示，梁君彥更加係冇影，而現場傳媒都係睇到直播畫面冇咗同埋見到官員離開會議廳，先知道原來會議已經結束。
咁啲議員又點知完會呢？據悉，梁君彥係直接以短訊通知議員完會，同埋話會喺今日朝早復會。咁搞法，梁君彥係咪以後都可以唔使現身？係咪可以靠視像開會呢？