政情：自拍王又衰多瓣 陳百里懶備課畀葉劉省一鑊
政府高官問責制一直備受質疑，其中副局長同局長政治助理就多次被外界批評人工過高而又質素參差。曾任保安局局長嘅立法會議員葉劉淑儀（葉劉）去年就喺立法會大會提出過質詢，要求就副局長同政助職位進行檢討。已經試過被議員不點名批評只顧自拍，冇推銷政策嘅商務及經濟發展局副局長陳百里，尋日又衰多鑊，搞到被葉劉鬧爆，不過今次就唔係鬧佢顧住玩自拍，而係話佢唔備課。陳今次真係要檢討吓。
議員曾不點名批評
葉劉去年三月曾提出口頭質詢，批評副局長同政助做嘢唔掂，仲問政府會唔會提供培訓。當時唔少議員都點名鬧爆部分政助冇影、唔安排會面等。立法會議員麥美娟亦曾不點名批評有副局長積極出席活動同成日自拍，但就冇向業界介紹政策。雖然冇點名，不過陳百里成日出席活動兼自拍，仲不時喺社交平台分享自拍照，都好難唔令人聯想係佢喇。
尋日立法會有議員就美國早前通過《香港人權與民主法案》質詢政府，並關注政府向美國進行游說工作事宜。葉劉就有關質詢追問政府時，就提到法案中有條款對本港國際關係地位有好大打擊，要求政府喺會上解釋法案第五條同第十條對本港有咩影響。
冇睇過條文口啞啞
由於商經局局長邱騰華放緊假，作為副手嘅陳百里自然要頂硬上。點知陳一開口已經被打斷，嚇到佢即刻呆一呆。當佢再回應並講到有關保障人權自由及《基本法》時，葉劉就出聲質疑話︰「我問你第五條講乜呀」，仲問陳︰「你有冇睇過條條文呀？」被問到口啞啞嘅陳惟有坐番低。立法會主席梁君彥之後再邀請陳回應，但陳就話手頭上冇相關嘅條文，要之後先至回覆番議員喎。
葉劉聽到就即刻話對陳百里好失望，仲話一個嚟答問題嘅官員連條文都未睇過，質疑陳根本冇備課。雖然陳尋日係代邱騰華上陣，不過都唔係藉口嚟嘅。陳咁樣嘅表現真係差強人意，就算副局長同政助備受批評，都唔怪得人喇。