中環出更：陳正欣上京公幹 買定口罩搓手液
最近流感肆虐，好多人都病咗，加上武漢又爆發肺炎，就更加恐慌。卓妮日前見到保良局副主席陳正欣，原來佢當晚就要去北京公幹，亦已經買埋口罩同消毒酒精搓手液，每去到人多嘅地方例如地鐵等交通工具就會戴。佢太太就叫佢食嘢唔好咁熱氣，可能飲多啲板藍根清吓熱咁喎。
另一位副主席林潞知道陳正欣要返內地公幹，就講笑叫陳唔好黐咁埋。林潞話預防流感最好就唔好出街，所以佢真係留多咗喺屋企，多人嘅公開活動就可免則免喇！佢啲仔女係讀國際學校，仲未開學所以未擔心佢哋會畀同學傳染，同埋學校有為仔女提供流感疫苗。
鄭錦鐘一早打定流感疫苗
前主席鄭錦鐘原來一早打定流感疫苗，做好預防措施。事關佢舊年感染咗甲型流感，要食一個禮拜特敏福先退燒，所以今年就嗌埋太太一齊打，仲話太太老喇要打定針喎。保良局主席馬清楠覺得運動好重要，強身健體自然就有免疫力防流感，佢都有提屋企人同工人要注意衞生，叫佢哋去完人多擠迫嘅地方，或者摸過公共設施一定要洗手。佢話因為好多人都好污糟，分分鐘摸完鼻涕，一唔覺意就摸落扶手電梯。
湯振傑：盡量瞓夠7個鐘
總理湯振傑本身係劍擊運動員，當然注重身體健康喇，佢認為做運動係預防流感嘅最好方法，但都要配合充足睡眠，所以佢話如果瞓到嘅話都會盡量畀自己瞓多啲，瞓夠七個鐘。同場嘅劍擊運動員江旻憓同輪椅劍擊運動員余翠怡就認為飲食上要營養均衡，江旻憓話媽媽會提佢食多兩個橙預防感冒，因為有維他命C啊！另一位劍擊運動員林衍聰就話媽媽有時都會煲啲湯水畀佢飲，但佢就會提媽媽唔好加內臟，因為內臟入面可能含有禁藥成分，運動員食咗就大鑊喇！
卓妮