政情：何啟明飛巴黎慶生 點知變咗搬運工
勞工界立法會議員何啟明前日三十五歲生日，因為太太仲喺巴黎讀書，所以之前已經飛咗轉巴黎同太太一齊提早慶祝喇。不過佢就話，點知去到就變咗兼職搬運工，唔通佢都要秘撈？
鐵路癱瘓 要幫太太搬傢俬
啟明就話自己早幾日飛咗去巴黎，同喺當地讀博士課程嘅太太提早慶生。由於太太平時難以獨自應付粗重搬運，加上當地交通服務受阻，太太平時買嘢都唔係咁方便，所以佢去到當地，就幫太太到連鎖傢俬店搬啲家具返住處，又要運送埋起居物資，所以咪搞到自己好似個搬運工咁囉。
啟明又話，眼見困擾法國經年嘅社會運動至今還未落幕，曠日持久嘅罷工行動令到鐵路運輸陷於癱瘓，令佢深感和諧穩定嘅社會，無論對當地居民定係外來遊客都係非常可貴，若果大家和和氣氣，少啲爭拗，社會運作應該會暢順好多。難怪前日佢正日生日，撞啱其所屬嘅工聯會搞活動，大家順道同佢慶祝時，佢都話生日願望就係「和平」喇。