政情：無煙活動 徐德義玩甩底
近日武漢爆發不明肺炎疫情，本港亦人心惶惶，全因港府防疫措施做得不足，而本港懷疑個案亦持續增加。但港府尋日先刊憲話要將「嚴重新型傳染性病原體呼吸系統病」納入法定需呈報傳染病，並修訂有關附屬法例，真係貫徹始終地後知後覺。而理應努力處理事件嘅食物及衞生局副局長徐德義就冇埋影，事關佢本來尋日要出席一個公開活動，但主辦單位就即日先知佢「放飛機」，搞到計劃被打亂，真係慘，而徐究竟去咗邊就冇人知喇。
大會臨場刪新聞稿名字
話說徐德義尋日原定出席一個「無煙老友記大使」嘉許典禮，不過喺活動開始之前，工作人員先至刪去徐德義喺新聞稿上嘅名。在場嘅記者即刻就問番大會工作人員，佢哋都只係回應話：「我哋都唔知呀！我哋都係今日先知佢唔嚟，話有事喎。」
雖然徐德義甩底，但好彩個活動仲有安老事務委員會主席林正財同埋香港吸煙委員會主席鄺祖盛出席，可以充撐吓場面，幫手講解吓一班「無煙老友記」喺一年內做過嘅宣傳工作同吸煙壞處，令活動總算圓滿結束。