政情：尹兆堅又逾期申入委員會
立法會大多數嘅事務委員會同小組委員會都開咗波做嘢，但議員尹兆堅（肥尹）日前去信工務小組委員會主席盧偉國，逾期申請加入工務小組。其實，肥尹都唔係第一次遲o架喇，佢舊年底亦逾期申請加入保安事務委員會，但唔係次次都會開綠燈，唔知肥尹今次入唔入到喇！
肥尹話一向跟開工務小組嘅嘢，只係舊年十月立會開鑼嗰陣臨近區議會選舉，佢擔心分身乏術，所以無入到工務小組，選舉結束後已向秘書處申請入番。擔唔擔心建制派議員會刁難？佢話工務小組關工程事，無政治問題，而佢因政治原因加入嘅保安事務委員會都無人阻，所以唔擔心喎。盧偉國就話會喺一月十五日嘅會議加入相關議程，而按一般做法，由班委員決定係咪接受遲加入嘅申請。
建制要求解釋原因
喺二○一四年嗰陣，十二名建制派議員申請逾期加入工務小組，當時正副主席都係民主派議員，申請嘅議員要出席會議解釋原因。同係工務小組委員嘅陳克勤話佢唔會反對肥尹加入嘅，但建制派仲未討論，佢仲話肥尹都唔係報名期間病，要得到委員會同意先得。
另一個委員陳恒鑌就話，民主派議員一四年刻意阻撓建制派議員加入，搞到建制派好似要求佢哋咁，又話既然民主派做落呢個規矩，建制派都要聽吓肥尹有乜嘢原因要加入。佢話唔會刁難肥尹嘅，但就話民主派早知結果又何必當初呢？