政情：泛民區議員杯葛「雞精班」陳學鋒：聞到葡萄味
政務司司長張建宗聯同部分問責官員喺本周五喺北角社區會堂舉行簡介會，即係所謂嘅「雞精班」，但大部分民主派區議員狠批係「單向式訓話」同做騷，拒絕赴會，而由落選嘅建制派組成嘅「議會監察」，其中中西區區議會前副主席陳學鋒日前喺Facebook上載咗條短片，指班民主派區議員同議會新丁口口聲聲話「落選區議員見林鄭，當選就見張建宗」，唔單止係搞錯事實，實質係葡萄，仲寸爆個別區議員話「雞精班」冇用，係口是心非。
嘲泛民上屆仲讚簡介會有用
民主黨、公民黨、民協同新民主同盟等民主派政黨好快就跳出嚟杯葛雞精班，陳學鋒喺短片中，話以過來人嘅身份評論，仲話隔空都聞到葡萄心態，「四年前我哋區議員都係見林鄭，不過佢嗰陣仲係政務司司長囉，所以佢哋今次見張建宗嘅安排係同級喎，唔明有咩問題。」佢仲叫班區會新丁唔好太葡萄，搞清楚事實先。
雞精班有冇用？陳學鋒又攞番當年區議員簡介會相關嘅報道，幫大家重溫吓民主派區議員嘅言論，佢話好似有啲「傘兵」，例如今屆成功連任嘅觀塘區區議員黃子健，佢當年都話「會上有提供地區資訊，可惜時間緊迫，提問嘅機會唔多，但交流始終有用」，又指同樣成功連任嘅民主黨副主席兼南區區議員羅健熙，當年更形容簡介會係「地區行政雞精班」，青年新政前成員、成功連任九龍城區區議員嘅鄺葆賢，當年都話簡介會有助同其他區嘅區議員交流，佢話唔明點解隔咗一屆，簡介會都未開，就唔同晒講法喎。
助了解區會如何與政府溝通
佢話雞精班係介紹政府同區議會點樣溝通同各部門內部嘅運作，若果班議會新丁唔去聽，點知政府部門運作，有市民搵佢哋幫手都唔識幫，咁點做議員呀？所以班民主派新丁唔好乜都未試過同了解過就即刻否定，亦唔需要係咁話簡介會係「單向式訓話」。
對於有個別區議員批評簡介會冇用，司局長不如落區議會接受議員質詢，陳學鋒話熟悉區議會運作嘅人都知道，過往唔少司局長有落區同區議員交流，而特首亦指示司局長要去落區，所以將來大把機會，唔使咁心急喎。