中環出更：天氣乾燥 周伯展教多眨眼護目
天氣轉涼濕度低，唔單止皮膚乾燥，眼睛亦會出現「乾眼症」。卓妮日前見到香港眼科醫學院前院長周伯展，同佢傾開眼睛保養心得，佢話近排天氣非常乾燥，風勢強勁，好容易出現眼睛製造淚水唔夠，形成「乾眼症」加劇，全港約六個人有一個係咁。
咁有乜保護方法？周伯展話最好就係最少五至六秒眨一次眼，或定時起身行吓用眼睛望住最少二十呎遠事物，而戴隱形眼鏡或坐飛機人士就要配備眼藥水，眼藥水最好要有眼科醫生檢查後配買，加埋要有充足嘅睡眠，好好讓眼睛真正休息。佢仲話如果有近視嘅人上飛機前可先戴眼鏡，到落機後先轉番隱形眼鏡佩戴會好好多，至於自己喺診所工作，會爭取喺診症時，盡量喺每次診症之間嘅時間休息，合埋眼休息同起身行吓，用眼球盡量睇多啲遠嘢，都好有幫助。
蔡金挺嘆電子奶嘴損視力
轉頭見到綽號「入信大王」嘅寶保護眼基金創會會長蔡金挺，雖然年過半百，但視力仲好過好多後生仔，到底佢係靠乜嘢方法保護視力呢？佢話好簡單，只要喺充足光線嘅環境中閱讀，睇手機每次以五分鐘為限同埋得閒用手掌肉喺眼球周邊按摩幾吓。
蔡金挺慨嘆時下嘅家長，往往將智能手機視為「電子奶嘴」，對年幼子女嘅視力絕對係有害無益。佢又話市面上雖然有聲稱可以護目嘅補充劑，然而要見效，就可能要服食上噸計嘅數量，至於杞子同菊花等可以「明目」嘅中草藥，亦欠缺量化指標來印證其功效，因此要維持良好視力，始終都係要從小就養成良好嘅閱讀習慣。
香港中華廠商聯合會行政總裁楊立門認為一個人嘅視力同遺傳頗有關係，事關佢同媽媽一樣毋須戴眼鏡，應該係得益於媽媽嘅良好基因，縱使經常犯上不良嘅閱讀習慣，如昏暗環境下睇書或者臥床閱讀，但佢嘅視力一向良好，係直至邁向「登六」先有些少老花。不過佢慨嘆自己嘅囝囝反而得唔到良好嘅視力遺傳，年紀輕輕就要戴眼鏡嘞！
卓妮