政情：籲醫護專業 以病人為先 陳家亮反對抗爭無底線
反修例示威衝突沒完沒了，戰火更一度蔓延至校園。香港中文大學醫學院院長陳家亮尋日喺電台節目話，對舊年十一月中大發生嘅衝突感到難受，亦對多人受傷、社會變得兩極而感到痛心，但佢唔認同以不公義嘅手段去爭取公義，寄語學生應「上醫醫人」，先盡己任先能夠為社會臻更大理想。
珍惜唔等如縱容
陳家亮話現時社會變得兩極，「非黑即白，非黃即藍」，令香港素來嘅言論自由、和而不同均蕩然無存。身為醫生嘅佢對多人受傷感到痛心，認為縱使身體上可以痊愈，但係精神上受到的創傷極為深遠，甚至乎難以復原。
佢曾提出社會要學習了解同珍惜下一代，但珍惜唔等如縱容，佢唔認同以不公義嘅手段去爭取公義，亦唔接受以侮辱或欺凌嘅手法對待持唔同意見嘅人。佢又話理解醫護會有唔同立場同意見，但認為穿上制服後便應放下自我，全心全意以病人利益為先。
比起「上醫醫國」，但佢認為更應該係「上醫醫人」，醫護需做好本分，先有能力為社會成就更大理想。佢認為社會愈係彎曲悖謬，醫護人員愈需要堅持和發揮最高嘅專業精神。