政情：無緣做童軍 李家仁遺憾
雖然要受到紀律約束，但仍然有唔少人渴望加入制服團體。唱「小明」系列兒歌嘅李家仁醫生，尋日為本地漁農美食嘉年華擔任表演嘉賓，當佢喺會場內見到制服團體嘅青少年負責維持秩序，就想起自己年少嘅一件憾事，就係無緣加入童軍。
免增父母負擔 學生夢未圓
李家仁話以前就讀嘅學校雖有童軍隊伍，但名額有限，加上課餘時間，經常都要到家人開設嘅書店幫手，同埋唔想因添置制服同參與活動，為父母帶來額外嘅經濟負擔，所以學生時代嘅佢，加入童軍只能停留喺夢想嘅層次。
醫生活動多 求加入遭拒絕
後來佢踏入社會謀生，嫌醫生工作經常要留喺診所，於是加入多個社區服務組織以擴闊人脈，並喺偶然機會下結識時任童軍總監嘅周湛燊。為咗一償年少嘅心願，佢向周湛燊提出成為童軍一員嘅要求，點知對方一口拒絕，理由係一旦加入童軍嘅大家庭就必須全情參與，然而當時嘅佢已先後加入樂善堂同扶輪社等多個組織，難以騰出時間嚟應付童軍各項活動咁話。
儘管無緣成為童軍，但佢仍然對制服團體有好高嘅評價，尤其時下嘅青少年容易沉溺網絡世界形同御宅族，而透過制服團體嘅活動可以接觸社會各個階層，擴闊生活視野。