政情：立會新春午宴 民主派唔畀面
踏入新嘅一年，社會仍然持續政治對峙氛圍，民主派同政府關係依然對立。臨近歲晚，傳統上立法會會邀請特首同一眾高官出席新春午宴，而中聯辦亦都會舉行新春酒會宴請社會不同界別人士，但民主派明言繼續杯葛立法會午宴。
特首高官同場 被指形式化
立法會按慣例喺下月七日舉行新春午宴，並由主席梁君彥作東宴請特首同一眾問責高官出席，希望「歡聚一堂、共賀新歲」。舊年立法會午宴正值政府提出修訂《逃犯條例》，全體民主派嘅立法會議員決定杯葛，仲話宴會只係形式嘢，大鬧無實質效用。
一年過去風波未平，社會撕裂愈見嚴重，民主派會議召集人陳淑莊就話，今年繼續唔會出席午宴，而民主黨尹兆堅就講明，其實只要諗吓香港依家想唔想、有冇心情搞呢啲活動，就會知道答案咁話喎。