政情：泛民素人拒溝通 張建宗慘食檸檬

區議員簡介會 被指訓話場合

張建宗尋日上晝出席完活動後提到，本周五會聯同幾位局長出席區議員簡介會，會上主要介紹整個區議會運作、地區同唔同政府部門嘅關係，仲想探討吓雙方未來嘅合作空間。佢就話搞呢個簡介會係慣常做法，過去幾屆都係咁樣做，仲形容呢個簡介會係溝通嘅開始，更指希望到時可以有多啲區議員出席添！

不過，全港十八區區議會四百幾位區議員入面，相信張建宗到時只會見到當中嘅幾十位，仲要全部清一色都係建制派，事關唔少泛民區議員都透過黨團，或者聯合其他同區嘅區議員發聲明，指拒絕出席呢個會面。當中用字最狠嘅要數公民黨，佢哋唔單止狠批簡介會係「單向式訓話場合」，唔想做布景板，更同時要求政府官員出席區議會會議，接受區議員質詢。

民協亦發聲明指會杯葛會面，又批評一眾當選嘅代議士只能見張建宗，但落選嘅建制派參選人就有得見特首林鄭月娥，指做法再次凸顯政府漠視市民意見。

落選反而見特首 做法荒謬

另外，表明全體區議員都會杯葛會面嘅民主黨，同樣狠批政府做法非常荒謬，又鬧爆政府毫無誠意，而新民主同盟亦決定杯葛會面。

批評大搞公關騷 集體杯葛

唔單止傳統泛民政黨，全港十八區有唔少區，泛民同素人區議員都達成共識，一齊杯葛出席簡介會。包括雙料議員鄺俊宇在內嘅元朗非建制派區議員就發信畀張建宗，「請佢食檸檬」之餘更大鬧政府搞嘅係「公關show」。油尖旺民主派區議員亦發表聯合聲明，批評政府多番傳出委任落選區議會者出任公職作政治酬庸，更反建議張建宗同佢哋一齊到最前線了解近日緊張嘅警民關係咁話喎。

觀塘區議員梁凱晴亦話佢同當區其他素人以及泛民區議員都唔會出席會面，認為簡介會只係「做show」，只會嘥時間。據了解，包括屯門、黃大仙等多個區份嘅非建制派議員都一致決定唔出席簡介會，睇嚟張建宗希望認識多啲區議員嘅願望要落空喇！