政情：沙田區會甫開會 即為默哀爭拗
沙田區議會尋日召開首次會議，民主黨程張迎、沙田區政黃學禮喺無競爭下擔任正、副主席。有區議員要求為喺修例風波中逝世示威者默哀，但區議員莫錦貴同林港坤反對，認為默哀對象應包括被磚掟中頭部亡嘅清潔工，二人離場抗議。
政府職員拒絕 2區議員離席
話說沙田民政事務專員陳婉雯同秘書處職員冇參與默哀，有區議員要求解釋。陳稱默哀屬政治立場表態，唔默哀係個人選擇，佢尊重區議員嘅抉擇，盼區議員都尊重佢哋嘅決定。但民主派區議員不滿，其中許銳宇直斥陳冷血，指年輕人對政府同前途感到絕望而輕生，陳作為政府一員應感到惋惜，認為有人性嘅人都應參與悼念，又指陳所講嘅政治表態係侮辱區議員，陳再回應指希望議員尊重有唔同意願嘅自由。
丘文俊則提出將地區設施管理委員會改名為地區設施管理及保安事務委員會，討論警方暴力問題，多名民主派區議員同意，黃學禮倡成立工作小組，並邀獨立專家同證人出席。
另外，數名沙田帝怡選區居民喺會議前，就區議會民主派撞區事件向程張迎遞交請願信，指民主黨立法會新界東議員林卓廷雖已喺網上道歉，但佢哋感受唔到。程承認整件事可做得更好，需檢討。