政情：公僕參與暴亂人數有幾多？ 周浩鼎咬實羅智光唔放
修例風波持續近七個月仍冇平息迹象，期間曾發現有公務員參與示威遊行，立法會議員周浩鼎（阿鼎）批評公務員事務局仍然採取迴避嘅態度，會繼續要求局方正面交代公務員參與暴亂嘅確實人數，同埋有幾多公務員因而被懲處。睇嚟佢係咬實局長羅智光唔放嘞！
阿鼎尋日喺Facebook上載咗一段短片，提及反修例嘅暴亂未停，且有死灰復燃嘅情況。佢重提舊年喺立法會提出口頭質詢，要求羅智光回覆有幾多公務員曾參與暴亂，同埋內部處分嘅情況係點？而當局嘅答覆話有四十三名公務員可能曾參與暴亂或正在處理有關嘅情況，而當中只有極少數被停職。
批評局方迴避 將於立會跟進
局方呢個答案，阿鼎直言係未夠嘅，尤其唔少市民都質疑呢個數字，佢話到目前為止，局方依然冇畀到一個正面答覆，又直指局方迴避呢個問題，所以佢同黨友會喺立法會繼續跟進有關事宜，因為公務員係執行一國兩制嘅重要團隊，市民希望佢哋真係奉公守法。
展望新一年，阿鼎話依家距離止暴制亂仲有距離，所以政府有好多工作要做。佢認為政府必須上下一心，由上而下做好止暴制亂嘅工作，唔係只係警方孤軍作戰。