政情：玩足五個月 梁栢賢重出江湖任城大校董

又入番醫管局？唔係，只係有新公職！政府尋日刊憲，公布委任PY出任香港城市大學校董會成員，任期三年，已經喺今年一月一日生效。

話時話，PY退休後嘅生活真係優哉游哉，喺啱啱過咗嘅聖誕節，仲同太太去咗芬蘭慶祝結婚三十三周年紀念，喺冰雪餐廳撐枱腳，又去聖誕老人村搵聖誕老人，兩公婆不知幾開心。

余惠賢賴旭輝加入浸大

當地嘅雪景靚絕，PY亦有扮埋聖誕老人咁推雪車，之但係車上冇聖誕禮物嘅，仲學人拋雪添！佢早前喺Facebook上載一段拋雪嘅短片，睇落去好似漫天都係雪，點知……佢貼文話：「如果學人拋雪，記得唔好將啲雪拋落自己頭上面，十分痛又凍！」呢次真係捉蟲嘞！

另外，香港浸會大學校董會亦添新成員，包括香港浸會醫院行政總監余惠賢，同埋香港測量師學會前會長賴旭輝。