政情：隨時爆發倒閉潮 邱騰華仲放六日假
無論係啱啱過咗嘅聖誕同元旦，社會都好唔平靜，事關反修例嘅示威衝突持續，仲會陸續有嚟，喺本港經濟受到重創下，商務及經濟發展局局長邱騰華竟然仲敢放假，喺今日起連放六日，難道佢真係可以放得安心？
聖誕元旦衝突 眾司局長少理
我哋之前都講過，一班司局長懶理網民預告會喺聖誕同元旦日上街，包括財爺陳茂波、運輸及房屋局局長陳帆同民政事務局局長劉江華等都喺嗰段時間放假，而事實上真係爆大鑊，雖然佢哋已歸位，但係示威衝突亦不停爆。
唔知係咪頂得耐，政府尋日刊憲，邱騰華將喺今日起休假六日，直至十號先返工，而休假期間就由副局長陳百里署任。
老實講，過去嗰個幾星期本來係旅遊旺季，但因反修例風波搞到遊客大跌，本港嘅旅遊業面對好嚴峻嘅局面，旅行社同食肆隨時都出現倒閉潮，再加上網民同啲工會又想搞大三罷，喺咁差嘅情況下，邱騰華放假係咪放得安心呀？抑或係中美可能喺月中簽署貿易協議，諗住到時經濟會有所改善，所以佢想趁空檔抖吓氣，再返嚟等好消息？