政情：開11次內會仍未選出主席 何君堯郭榮鏗爆罵戰

話說喺會議期間，何君堯發言時鬧爆郭榮鏗無能，濫用權力同程序，令議會對佢失去信心咁話，講講吓又評論郭嘅坐姿不正，成個人打側坐影響風氣，侮辱議會名聲，又話如果郭下一屆仲做到法律界議員，就係對法律精神嘅侮辱喎！郭聽完即刻反駁，話講到侮辱議會名聲，何君堯認第二，就冇人敢認第一（口架）啦，仲加多句「面係人畀，架係自己丟」添！

陳凱欣鬧嘥時間 應先處理法案

民主派拉布，建制派忍無可忍。陳凱欣鬧郭浪費全港市民時間，話搞到內會目前無法處理成立法案委員會，又質疑根據《議事規則》同《內務守則》，即使未選出正副主席，上年度嘅主席都可以履行內會主席職務決定議程，先處理法案再選主席，要求立法會秘書處釐清。郭榮鏗就解釋話，議事規則委員會之前已經處理咗有關問題啦，都清楚指出正副主席選舉係新會期首個程序，要先完成才可以處理其他事務，仲叫陳不如先認真閱讀文件。

旅遊界姚思榮就提到擔心一直未選到正副主席，好多法案無法處理，憂慮啲關乎民生嘅議案做唔到，甚至《國歌法》都會冇咗，但民主黨許智峯（峯鴿）同公文袋楊岳橋就話，內會打死結完全係政府咎由自取，質問係國歌法重要定五大訴求重要喎。而郭榮鏗會後都直指未能選內會正副主席癥結在於政府，如果政府執意推行國歌法、辱警罪等具爭議議題，議會就冇辦法好似政府口中所講咁正常運作喇。

吳文華再批評秘書處唔識變通

議會內爆罵戰，現任秘書長同前秘書長對《議事規則》嘅解釋亦現分歧。話說秘書長陳維安日前反駁吳文華同劉健儀話內會急事先處理，之後先選正副主席建議唔可行，吳文華尋日就再批評秘書處唔識變通！直斥完全唔明白點解秘書處要用咁狹窄嘅方法解讀《議事規則》，又講到早年負責草擬會議常規時，係期望內會工作係無間斷進行，所以先會將內會主席任期寫明到新主席當選為止，而唔係跟大會會期，仲話立法會喺○二年修訂議事規則，係要求內會主席選舉「可以」在新會期前進行，唔係「必須」喺新會期前進行咁話。