中環出更：小休午膳都唔夠 梁君彥要早一粒鐘完會
繼立法會大會設有小休同午膳時間後，立法會主席梁君彥決定，喺下周三嘅大會，即係二○二○年首次大會起，提早一粒鐘完會，即係由原定嘅晚上八點，提早喺七點就完會嘞！有乜嘢事要趕收工呀？
稱需處理會議外主席工作
立法會秘書處尋日出咗通告，話梁君彥指示，為咗畀佢有多啲時間處理主持會議以外嘅立法會主席工作，由依家開始，星期三大會由十一點開始，嗰日上晝冇小休，中午一點半係午膳時間，有一個鐘頭，下晝四點四十五分至五點十五分係小休，之後開到夜晚七點就完會嘞！
星期四朝早九點復會，唔知係咪開得早，大約十一點有小休，放半粒鐘，可能係食啲嘢，中午一點鐘食晏，有個半鐘時間，而下晝同樣有小休，之後都係七點鐘完會。老實講，依家開會好多時未開到八點散場，間中仲會早啲添！若果七點完會，可能六點幾就散場。
其實，以前開大會夜晚十點先完會，而喺梁君彥做主席冇耐，就已經率先縮短會議時間，例如大會只會開到周四，禮拜五唔開，而本來周四請議員食早餐嘅亦都慳番。因為內會未選到正副主席，冇人頂佢更，連去食飯同廁所都冇時間，所以先設小休同午膳時間，依家仲要提早收工，開會時間愈嚟愈短喎。佢所講嘅要有更多時間處理主持會議外嘅立法會主席工作，究竟係乜呢？
卓妮