中環出更：白色假期 黃偉鴻滑雪頻甩轆
好多政商界人士早前都趁住假期外遊，去過一個白色聖誕，好似香港中華廠商聯合會（廠商會）會董黃偉鴻（Ellis）咁，唔單止喺冰湖釣魚，而喺滑雪嘅過程中仲頻頻甩轆，非常搞笑。
Ellis早前喺Facebook（Fb）連日嚟上載咗呢次白色聖誕之行嘅相同短片，話說其中一段短片，淨係見佢影住及膝嘅雪步行，但見唔到樣，聽見佢氣囉氣喘咁行，仲一邊行一邊話，嚟得滑雪，不如滑埋浪喇！何解？原來佢誤入禁區，仲迷咗路，當時應該係跌低咗，所以要攞住雪板行喇！過兩日坐雪橇，佢貼文話見啲狗狗拉得咁辛苦，於是佢就幫手推雪橇，點知去到平地嘅時候，啲狗狗一支箭咁飛快向前跑，搞到佢上唔切雪橇呀！
全球暖化 沈運龍京都無雪玩
唔單止滑雪同坐雪橇，佢仲喺冰湖釣魚，親手鑽開個小洞，再落魚絲釣，呢次佢好好彩，畀佢釣到條好靚嘅魚仔，影完相就放番落湖嘞！
廠商會常務會董沈運龍都有去滑雪，但佢就話自己係全球暖化嘅受害者喎。發生乜嘢事？佢喺Fb貼文，話去咗京都諗住滑雪，點知啲雪融晒，冇得滑雪，佢咪要屈喺酒店。冇得滑雪咪去行街囉，可能嚟緊係鼠年，佢留意到好多老鼠公仔，唔知佢行到去邊，見到有隻招財貓，佢仲扮埋招財貓嘅手勢，話幫港人招財喎。
之前都講過，立法會議員鍾國斌去咗芬蘭賞雪，幾日前佢喺Fb上載咗兩張相，仲貼文話：「點樣可以喺零下十度着短袖衫扮大隻？」大家估唔估到？佢就開估話先要入去Sauna屋焗個有七十度熱嘅Sauna，出嚟包你瞓喺雪度都唔怕凍。」有網友見到佢張相，直情話佢喺度扮大隻呀！簡直係冰火兩重天，大家想唔想試吓呢？
卓妮