政情：公民講場：港台大花筒超支 各界促審計署查數

香港電台帳目混亂，經常「大花筒」亂咁運用經費，審計署去年更對港台進行調查，狠批港台製作費用高，但睇嘅人就只得好少，建議港台要衡工量值。話口未完，港台今年又使大咗，支出比年度預算超出約五百萬元，原因係新聞部要報道反修例運動，搞到用多咗錢喎，港台節目顧問團其中廿多名成員更要求政府要增撥資源畀港台添，真係離譜，令社會人士隨即鬧爆，尋日仲有人提出政府要主動要求審計署再調查港台帳目，睇吓可否再削減經費。港台一向被批評製作嘅節目內容偏頗，少人睇之餘，仲唔好好睇住盤數，負責嘅廣播處處長梁家榮如果遲啲被截水喉，真係自己攞嚟喇。