政情：佳節燈飾悶夾貴 趙恩來擬改設計
每逢聖誕同新年，唔少區議會都會喺區內布置燈飾，靚唔靚就見仁見智。荃灣候任區議員趙恩來質疑荃灣區議會每年預留近二百萬元嚟搞節日燈飾係浪費公帑，近日喺通訊平台就該區嘅聖誕燈飾事宜搞咗個民調，唔通佢想喺上任後取消布置聖誕燈飾？
區會年花194萬 搞民調求變
趙話，依家每年一百九十四萬元嘅節日燈飾布置預算已接近區議會八百萬元社區參與撥款嘅兩成半，仲要因為受招標制度限制，年年都搵同一間承辦商，整出嚟嘅燈飾亦年年一樣，又悶又醜。近兩年承辦商嘅燈飾連新年生肖都慳番，只得「新年快樂」字樣再加個年份。有人就覺得燈飾唔環保，完全冇存在需要，亦有好多居民質疑有關撥款係咪用得其所，認為可將撥款用作社區服務。
趙亦都因為咁先搞民調，畀居民投票揀新一屆區議會應該點做，幾個投票選項包括完全取締節日燈飾項目、裁減預算、改革招標制度，及引進更多社區參與元素。暫時最多人贊成引進更多社區參與元素。趙就話可以考慮搞個燈飾設計比賽，等區內年輕人多啲機會參與。