政情：產品有質素 趙傑文無懼「顏色認證」
因社會運動而出現嘅「黃色經濟圈」令到營商者唔止要應付同業競爭，仲可能會因為政治立場而受影響。不過本身有經營食肆嘅傑出青年協會主席趙傑文就話，基於理念或立場嘅消費行為並唔係新鮮事，過去都有好多人響應購買國貨等行動，認為「顏色認證」雖然對營業係有影響，但顧客會否絡繹不絕，始終都係視乎產品質素同服務水準喎。
服務優質 方為招徠之道
趙傑文話，佢最近都有留意到某間積極支持社運嘅冰室門庭若巿，佢都幫襯過呢間冰室，發覺佢哋嘅食物材料上乘，取價亦十分公道，認為呢間冰室嘅立場雖然係可以吸引理念相近嘅客人，但食客繼續支持，都同堅持優質嘅菜餚同合理嘅收費有關，否則消費者光顧完一次，就唔會再返轉頭喇。
講起食肆生意，趙就話自己間食肆嘅服務對象都係以街坊為主，所以受社會運動嘅影響唔似得旺區咁大，不過因為巿道不景，食客消費時都冇以前咁疏爽喇。