政情：蔣麗芸舌戰泛民 鬧爆國難五金壞人
反修例風波持續超過半年，至今有數千人被捕，當中包括唔少學生同年輕人，不論建制派定係民主派陣營人士都大呻心痛，擔心年輕人未來。立法會議員蔣麗芸（Ann）尋日就同多次喺示威現場附近售賣頭盔、眼罩、防毒面罩等裝備予學生同年輕示威者嘅「國難五金」負責人李政熙同場，Ann仲當場鬧爆李係「壞人」同「社會敗類」添，真係好火。
話說Ann同李政熙等人尋日喺一個電台論壇節目擔任嘉賓。李就提到，眼見唔少年輕人走上街示威，曾經仲有十一歲嘅小朋友去佢嘅舖頭，睇到咁都覺得心痛，認為年輕人尋求嘅唔止係裝備，仲有自由同出路，反問成年人係咪應該要肩負起責任保護班年輕人。本來咁都算喇，點知李就矛頭指向Ann，話︰「一日蔣麗芸呢種人喺香港唔消失，（示威活動）係唔會有得停（口架）！」
鄺俊宇挑機 被指龍門搬不停
Ann本來都仲沉住氣，不過同場嘅民主派立法會議員鄺俊宇（Roy）就挑機問Ann係咪支持換特首。Ann隨即反問換特首係咪就可以解決問題，又批評民主派不停為五大訴求搬龍門。李政熙之後再加入戰團，話喺獨立之外係解決唔到問題，仲諷刺地話︰「Ann姐你有見地。」
撐學生上街 李政熙遭鬧敗類
見Ann冇反駁，李政熙就繼續講，話年輕人連真槍實彈都唔驚，點會驚出年冇飯開，認為年輕人搵到方向後唔介意犧牲，成年人係應該要支持佢哋。阿Ann終於忍唔住反擊問李︰「你知唔知小朋友幾慘？咁你介唔介意犧牲？」仲直斥李︰「呢啲就係社會裏面嘅敗類」，批評李支持學生上街，聲言如要調查就應該先查李呢啲支持學生上街嘅人。
對於未來仲有唔少具爭議嘅法案，Roy就認為政府唔應該強推，李政熙就話一旦推出，就會引起更激烈嘅反抗。但Ann反而話政府應要盡早實施相關法案，質疑係咪覺得今年示威活動仲唔夠激烈。李跟住又再次插嘴，猛話唔夠激烈，仲建議政府應該喺農曆新年幾日假期強推法案。Ann即刻扯火鬧爆「佢呢啲真係壞人嚟」。好彩個論壇只係約一小時，否則佢哋真係唔知嗌交嗌到幾時喇。