中環出更：政府唔修例 葉劉直言感「被跣」

葉劉喺尋日一個訪問憶述當時情況時話︰「我當然有問政府，我打電話去問，會唔會退讓，佢哋話唔會。」惟政府唔止決定暫緩修例，最後仲正式向立法會撤回草案。葉劉覺得被跣，甚至嬲嬲豬都好合情理喇。

爆料稱行會成員曾請辭

葉劉仲喺訪問中爆料，話行會成員曾向特首林鄭月娥提出辭職，明言如果辭職可以幫到林鄭嘅話，佢哋並唔介意。不過林鄭就話行會嘅角色「邊緣」，淨係畀意見，要問責都未輪到行會成員喎。

咁司局長角色唔邊緣喇啩，但葉劉就話官員要改組，首要考慮係幫唔幫到件事，又話既然問責班子呢幾個月嚟咁辛苦，真係唔明白班問責班子係咪真係咁戀棧喇。不過佢都提到，喺政府嘅角度，就算畀班高官離開，都要諗搵邊個嚟填補。至於被問到邊位官員最應該問責，佢就話唔方便講喎。

卓妮