中環出更：車隊大廚抱恙葉恭正代煮60人分量
唔少人都鍾意下廚煮番幾味，不過如果一次過要煮幾十人嘅分量就真係有啲難度喇。曾係賽車手嘅仁濟醫院副主席葉恭正（Paul）日前出席晚宴時提起，有次帶隊去巴林比賽，點知車隊廚師病咗，臨時甩底唔肯嚟，結果要由佢頂上，客串做車隊大廚，仲一煮就煮咗兩三日，每餐都要預備六十人分量。最後佢就整咗簡單嘅碟頭飯同意粉喇。
去回教國家參賽 蝦碌搵煙肉
Paul直言好彩平時都有下廚，所以唔算太難，但嗰次就發生咗小插曲。話說佢本來想整煙肉，喺當地超市搵咗成個鐘，最後都買唔到，查問之下先發覺因為巴林係回教國家，所以係冇豬肉賣嘅，佢都話諗起都覺得搞笑。講開煮嘢食，仁濟主席王賢訊（Vincent）話，過節時佢都鍾意自己落吓廚，不過廚藝就冇太太咁叻，招呼親朋戚友大排筵席都係一手包辦，食到個個都舔舔脷喎。
陳李詠詩教煮飯 傳承順德菜
Vincent當晚帶埋二仔出席，仲同二仔喺台上合唱大展歌喉。問到佢新年會唔會去玩，佢就話因為太太一月中會生B女，係太太第四胎，所以會等太太養好身體先再算。佢又話，過往新年都有去旅行轉吓運，有時近近哋就去台灣，或者坐高鐵去內地城市玩幾日嘅。
同場仲見到仁濟副主席周松東、黃楚淇同總理陳李詠詩（Jenny）等人。本身係順德人嘅Jenny就話，過年會喺屋企炸角仔、煎堆、笑口棗等賀年小食，都係佢好鍾意煮飯嘅爺爺教落嘅。佢仲話，十一、二歲嘅時候已經試過學整魚翅，學習點樣處理啲魚鰭同骨，而佢平時會煮嘅順德菜就有煎釀鯪魚、金錢雞、豬網油炆鱔等。佢話為咗薪火相傳，會教小朋友煮飯，仲讚小朋友煮得好過自己喎，似乎一家都好有廚藝天分喇。
卓妮