受到反修例衝突嘅打擊，各行各業都受到重大影響，喺聖誕同新年期間本來係展覽同旅遊高峰期，但就變咗寒冬，參展商大跌，而業界預料喺明年初會有三成嘅賓館結業添！話時話，財政司司長陳茂波（波叔）先後推出四輪嘅紓困措施，話會幫中小企同旅行社，但係實際幫助有幾大？睇吓賓館結業潮打到嚟，又會製造大批失業大軍，就知道紓困措施救唔到業界，唔該波叔戙高床板諗清楚，仲有乜嘢招可以解困？否則只會又再爆發民憤。
