政情：狄志遠劉燕卿任廉署諮詢委員

即將踏入新嘅一年，好多諮詢委員會都會換人，政府尋日公布廉政公署四個諮詢委員會嘅新委任同再度委任成員嘅名單，其中廉署事宜投訴委員會變動最大，半數係新委任嘅，當中包括新思維主席、立法會前議員狄志遠（Dick）同前申訴專員劉燕卿。

廉署事宜投訴委員會共有八名成員，四個係新委任，包括阿Dick同劉燕卿，劉燕卿喺今年三月底任滿申訴專員一職，估唔到咁快又有新公職。另外兩個就係立法會議員容海恩同漁農界議員何俊賢，填補兩個任滿嘅成員，亦即係建制派嘅立法會議員梁美芬同麥美娟。新成員嘅任期由明年一月一日起生效，為期兩年。

原來阿Dick唔算係新人，事關佢做過六年廉署審查貪污舉報諮詢委員會成員，應該算係熟手技工添！佢話政府係喺前兩日搵佢嘅，佢都希望可以幫到手喎。

另外，政府亦委任香港總商會主席夏雅朗成為審查貪污舉報諮詢委員會成員，而東華三院執行總監蘇佑安則獲委為防止貪污諮詢委員會成員，蘇佑安喺加入社福界之前，喺政府任職運輸署助理署長。