政情：泛民選區會主席 譚香文轟黑箱作業
新一屆區議會任期將喺明年一月一日展開，其中民主派喺黃大仙區議會全取二十五席，亦已對正、副主席有共識，由民協嘅資深區議員許錦成出任主席、民主黨前成員黃逸旭出任副主席，但另一資深區議員、獨立嘅譚香文就不滿，狠批民主派講唔出協商機制，甚至鬧爆係黑箱作業、排除異己。
譚香文接受查詢時透露，指許曾透過電話表明有意做主席，佢亦隨即向對方講話有意做主席，仲話既然許做主席，佢可以改做副主席。佢仲透露，曾聽聞唔止一人想做副主席，當時亦建議佢哋輪流做一年，但佢就唔知民主派有冇討論過。
對於民主派嘅共識，譚認為欠缺透明度，又質疑「係咪票多就有共識，係咪行緊政黨文化呢」？佢又炮轟「同建制派一樣囉，行緊建制派嘅路囉」。佢認為選舉機制應該更加透明，建議由區內嘅居民投票決定，同埋應該由政治素人出任副主席，以培育新人。
許錦成出任 指留待公眾判斷
許接受查詢時話民主派曾開過兩次會議，討論共識係正、副主席將係兩年一任，會喺第三年時再做檢討，到時再決定人選。佢仲透露，曾經同譚傾過，亦知道佢嘅意見，而喺第一次會議時有人缺席，所以最終喺第二次會議先有正式決定，當時席間冇人提出唔同意見，仲話如果有人都想做主席，當時係可以按程序去傾。對於被批評係黑箱作業、程序恰當與否等，佢認為應留畀公眾作判斷。