政情：建制斥立場偏頗 港台求泵水勢受阻

陸頌雄：繼續如此態度 不如摺埋

港台節目顧問團成員約一百三十人，但參與今次聯署嘅只有二十幾人，包括立法會資訊科技界議員莫乃光同社會福利界議員邵家臻、立法會前議員單仲偕、灣仔區議員楊雪盈等。公開信唔單止提到港台超支問題，又指港台作為公營廣播機構，提供重要新聞同直播節目，幫助市民了解現場情況，政府係有責任因應港台發展需要嚟增撥資源，以助港台按《香港電台約章》責任，為市民提供多元化及高質素嘅公營廣播服務。

立法會議員陸頌雄直言，港台最為人詬病就係製作成本高、收視低，每集節目成本均比私營機構貴，加上節目內容立場偏頗，失去公共廣播應有嘅持平態度，更加少人睇︰「如果啲嘢持平，兩邊（立場）都有人睇，唔持平、內容偏頗，另一邊就杯葛（港台）。」揚言如港台一日唔改善，繼續持如此態度行事，不如「摺埋」，而立法會亦都難以支持撥款予港台興建新大樓，「如果仲無限泵水，市民都會質疑」對於公開信中提及警隊與港台兩者待遇差天共地，佢就認為警隊係喺示威衝突中執法，兩者不能相提並論。

蔣麗芸：需檢討吓有冇存在必要

另一議員蔣麗芸（Ann）就話喺八、九十年代開始聽港台，港台最原始功能係要宣傳政府政策，但近十幾廿年一路變成大力抨擊政府，當年簽約章話會不偏不倚報道，但呢幾年完全見唔到，唔止做唔到對政策嘅支持，節目亦唔持平，反問港台係以公帑支持運作︰「咁對政府公平咩？」阿Ann話唔止港台要檢討，邱騰華都應該證明港台係中立先，唔好蒙騙市民，重申港台如做唔到應有功能，就檢討吓有冇存在必要，如港台要自主就「自己搞掂」，做唔到就壽終正寢咁話。

商經局：港台過去9年開支倍增

商經局回覆，指政府多次指出喺過去九年，港台嘅開支累計增加超過一倍，高於同期政府經常開支累計增幅，而公務員職位數目亦增加超過百分之四十，所以港台有足夠資源應付運作需要。