中環出更：區選開支申報 岑子杰一毫子都唔使畀
區議會選舉塵埃落定，不論係當選定係落選者都陸續申報選舉開支。成日呻窮嘅社民連，喺立法會係零議席，今次派出三人參選，就有兩人勝出，當選沙田區議會瀝源選區、民陣召集人岑子杰（Jimmy），選舉開支近六萬三千蚊，但就一毫子都唔使畀，因為有社民連幫佢埋單，佢嘅選舉開支中使得最多錢嘅部分係選舉廣告，大約有五萬八千五百蚊。同樣一毫子都唔使畀嘅仲有譚得志（快必），佢所屬政黨人民力量幫佢找晒數，總開支差唔多有四萬三千蚊。
岑敖暉選舉物資靠租借
贏得荃灣區議會海濱選區議席、學聯前副秘書長岑敖暉（Lester）一共用咗大約三萬五千蚊，各項選舉捐贈唔夠七百蚊，資料顯示Lester分別問人租借摺枱、輪椅、對講機、手推車等物品，計埋仲有九十六蚊嘅政黨折扣，呢十二項選舉捐贈金額加埋都只係六百五十六蚊。
何君堯獲捐贈羅漢果茶
至於建制派「雙料議員」方面，未能成功連任屯門區議會樂翠選區嘅立法會議員何君堯，選舉經費大約四萬一千蚊，宣傳品例如易拉架、刀旗布、橫額等等主要由深圳嘅工程公司製作，而競選團隊穿着嘅衣服就係喺廣州訂造，兩個比較搞笑嘅地方就係佢填有關選舉廣告資料時，將一份免費報紙嘅網站寫咗做「綱站」，第二就係佢獲屯門一間餐廳捐贈八杯價值一百二十八蚊嘅羅漢果茶，亦係佢唯一一項嘅選舉捐贈。
謝偉俊違規 被罰$874
保住灣仔區議會樂活選區議席嘅立法會議員謝偉俊（Paul），使費近三萬蚊。阿Paul請咗兩個兼職選舉助理，佢哋嘅人工同強積金加埋近四千九百蚊，特別嘅地方就係雖然佢喺灣仔區參選，但係佢聯同幾位九龍東區議員同幹事，一齊喺小巴車身落廣告，計埋佢自己嘅小巴廣告同九龍東廣告牌約三千三百元，而違規罰款近八百七十四元。
卓妮