政情：八網難逃：鍾國斌飛芬蘭過白色聖誕
聖誕節長假期最好就係外遊「叉足電」，之後返港再搏殺過，好似早前已經喺外地出席女兒碩士畢業禮嘅立法會紡織及製衣界議員鍾國斌（Felix），近日就轉到北歐國家芬蘭度過一個白色聖誕節。
景色靚到似聖誕卡
Felix去咗當地北部拉普蘭區首府羅瓦涅米（Rovaniemi）遊覽，話依家冬天只得三、四個小時有日光，居民大部分時間都要喺黑暗中生活，佢話個度啲居民好開心又有禮貌，所以無被環境影響到心情，仲話黑暗原來唔係咁得人驚啫。
Felix又喺雪地一間木屋前同雪人合照留念，佢話今年啲雪特別白，大讚每個景色都好似聖誕卡咁靚，相信呢個白色聖誕都會令佢好難忘。