政情：獲任青年廣場諮委會委員 林梓鴻攞安慰獎
早前有傳政府會向喺區議會選舉中落選嘅建制派委派公職，雖然引來社會爭議，但近日已先後有敗選嘅建制派獲委任加入唔同委員會。政府尋日公布委任青年廣場管理諮詢委員會新成員。兩名獲委任嘅新成員分別係今次區選中喺東區區議會西灣河選區落敗嘅新民黨林梓鴻，同埋青年民建聯主席施永泰。今次區選新民黨全軍覆沒，民建聯亦潰不成軍，唔通呢啲就係政府畀佢哋嘅安慰獎？
施永泰亦分一杯羹
今次區選新民黨派出二十八名候選人參選，但最終一席都拎唔到，而作為建制派第一大黨嘅民建聯都慘敗收場，只取得約二十個議席，比上屆少咗九十多席。唔少建制派都開始擔心嚟緊冇工開，而另一邊廂政府就疑似開始「分餅仔」。民政事務局尋日公布青年廣場管理諮詢委員會嘅成員名單，新民黨同民建聯中人都有份，唔知係咪算係安撫建制派喇。而林梓鴻同施永泰兩位新委員嘅任期就會喺下月一日起生效，直至二○二一年十二月三十一日，為期兩年。