政情：冬大過年 盧偉國教整車仔麵
中國人傳統習俗係「冬大過年」，一家團聚食飯共享天倫，就算未至於食鮑心翅肚，都會係一頓豐富晚餐。不過，一向廚藝了得嘅工程界立法會議員盧偉國（WK）就喺冬至當日喺社交網站教煮平民化美食「車仔麵」，但咪睇小佢煮嘅車仔麵，事關佢用獨門秘訣炮製佢認為最具特色嘅咖喱魚蛋同咖喱魷魚，仲有好幾款車仔餸，命名為「盧家私房車仔麵」。WK話，煮車仔麵都幾好玩，屋企人仲大讚好食添！
教路買「秘撈魚蛋醬」
WK話，以前啲小販真係推住架車仔、用明火賣車仔麵，依家就入咗舖頭做生意。佢話喺屋企整「車仔麵」都唔難，要邊款車仔餸悉隨尊便，佢認為最具特色係咖喱魚蛋同咖喱魷魚，佢仲教大家喺醬料舖買「秘撈魚蛋醬」，隻味同街邊嘅味道係一樣嘅。
WK話，先用蒜頭乾葱蓉起鑊，爆香咗魚片頭，再落醬爆炒，而咖喱魷魚嘅煮法亦同魚片頭嘅做法相同。至於其他車仔餸，WK就煮咗柱侯牛腩、蠔油豬皮、韭菜豬紅、酥炸雞翼、清湯蘿蔔、唐生菜及韭菜花，麵底就有生麵、油麵、河粉、米粉等，湯底就係牛腩牛骨清湯，唔講仲以為佢係開舖做生意嘅。