中環出更：情迷武俠小說 丘璟珊恨學輕功
金紫荊女企業家協會永遠榮譽會長丘璟珊（Carol）同好多武俠小說愛好者一樣，深被故事人物嘅不凡身手吸引，而芸芸絕世武藝裏面，佢就最嚮往踏雪無痕、躍跳如飛嘅輕功。輕功於現實世界十分罕見，不過兒時於夢境中經常跌倒嘅Carol話，若然真係可以掌握輕功，生活中會少好多障礙。而相較於以飛簷走壁著稱嘅日本忍者術，Carol就認為中國輕功較優，因為忍者衣着多數黑如墨炭，唔似得施展輕功嘅武林俠客古裝服飾咁飄逸多姿喎，真係搞笑。
馬清楠：傳統非落伍 外國常好評
Carol早前出席保良局一個慈善首映，陪同佢一齊入場睇戲嘅就有皮紋分析師葉鎧沂（Winnie）。Winnie話，中國人最先洞悉指紋喺辨別個人身份上嘅應用，後來西方發現中國人嘅指紋知識，並融入醫學研究當中，再衍生出分析人格同潛能嘅皮紋學，由此可見中國文化係一個有待發掘嘅寶藏。同場嘅保良局主席馬清楠就話，日常接觸嘅中國傳統事物絕非落伍，但往往喺得到外國人好評之後，大家先感受到其可貴，保良局都希望從教育着手，等巿民從小就懂得珍視中國傳統文化。
沈慧林：外國學生打乒乓球了得
講起中國文化同事物，青年工業家沈慧林就話，乒乓球雖源自西方，但喺外國人眼中早已成為最具代表性嘅中國國技。佢憶述昔日喺美國南加州大學時，不時同其他院校學生切磋球技，當地好多非華裔學生唔止乒乓球球技了得，對中國事物都興趣甚濃。咁身為中國人嘅佢同外國人打乒乓球時會唔會背負「國技」嘅壓力呢？佢就話唔會，因為中國人向來最注重嘅競技精神就係友誼第一喎。
卓妮