政情：傳因屢欠賭債 張俊勇辭人大

張俊勇繼十月被澳門賭場入稟高院追討約四百五十萬港元欠債後，今個月初又被美國拉斯維加斯賭場入稟要求還清一百三十五萬美元，即約一千零五十萬港元嘅賭債。報道指張已經喺十月同今個月先後兩次提出辭去人大代表職務，佢接受訪問時話係主動因個人原因辭職，認為賭場事件形象負面，唔想影響人大咁話。

美國資產被凍結 稱受害貿戰

張喺訪問中又自認之前輸好多錢，已經變賣緊資產同處理緊，質疑美國公司高調處理係因為佢係公眾人物同人大代表，而佢喺美國亦有投資高科技項目，佢喺美國嘅資產已被凍結，亦唔能夠入境美國，認為自己係中美貿易戰嘅受害者。根據目前機制，如張唔再出任港區全國人大代表，估計會由香港教育工作者聯會會長黃均瑜頂上。