政情：波哥怒喝峯鴿：唔好侮辱人
立法會財務委員會尋日開會討論本年度公務員薪酬調整撥款期間，主席陳健波（波哥）就同民主黨議員許智峯（峯鴿）爆發罵戰，究竟發生咩事呢？話說波哥提咗三個方案處理峯鴿提出嘅動議，但泛民主派議員就有啲擔心，所以要求法律顧問到場解釋。不過，民主派議員對法律顧問嘅解答唔多滿意，仲覺得法律顧問嘅回答唔清楚兼偏頗，好似只係為主席陳健波服務咁；峯鴿仲話：「我警告你啊法律顧問，你要尊重番自己嘅專業！」
峯鴿嬲到行咗出位
波哥聽到峯鴿咁講，就即刻插嘴大罵峯鴿唔好侮辱人，峯鴿就反駁話自己並無侮辱法律顧問，只係希望佢尊重職業。波哥就鬧峯鴿自己都冇法律專業啦，憑咩叫法律顧問尊重專業。因為波哥係咁插嘴鬧峯鴿，搞到峯鴿都講唔到嘢，結果嬲嬲哋行咗出位。波哥話，只要峯鴿返埋位同埋唔好侮辱人就可以再發言。經過一輪擾攘後，波哥終於畀峯鴿開咪講嘢，峯鴿重申無侮辱人，臨尾仲死雞撐飯蓋，叫波哥唔好做咪霸，改吓啲習慣喎。