政情：葛珮帆慶牛一 契仔扭計契女爆喊
聖誕節將至，原來立法會議員葛珮帆（EQ）係平安夜前夕、即下周一（23日）生日，佢嘅黨友同助理趁尋日人齊，喺記者會之前畀個驚喜佢，特登訂造咗兩個蛋糕，其中一個係佢最愛嘅大象蛋糕，仲安排咗佢嘅一對契仔契女陪佢慶祝生日。不過，兩個契仔女埋位就齊齊「甩轆」，契仔喺推緊蛋糕車個陣突然扭計，放低把刀就走咗去，而契女就喺唱生日歌嘅時候爆喊，要人抱走氹番先肯收聲。EQ話生日願望係天下太平，希望大家平平安安。
EQ話，依家嘅女性要兼顧事業同照顧家庭責任，面對好多困難，有見於社會對支持婦女嘅政策同措施並唔足夠，期望向政府就婦女政策發展提出多項建議，為婦女爭取更大嘅福祉同權益。建議有五方面，包括紓緩婦女家庭壓力、優化防止家暴政策、防止歧視政策、優化女性健康政策及加強婦女就業培訓。EQ又話，佢哋以往曾經就唔同嘅婦女問題向政府反映，有部分能夠成功爭取，但有啲就仲有漫漫長路先可以達成目標，未來會進一步訂下政策方向同議題，透過深化同研究，繼續推動婦女政策。