政情：區會取消預支 徐子見斥唔公平
新一屆區議會選舉早已塵埃落定，唔少候任區議員都忙住搵辦事處、請助理及購買物資等，但點知尋日東區區議員徐子見（Andy）就喺Facebook鬧爆，話今屆竟然取消咗預支七萬元供區議員租辦公室及買物資呢個政策，覺得對新一屆議員極度不公平，完全不可接受咁話。
Andy話，四年前東區區議會因應新議員需要進行一系列準備工作，容許候任區議員喺上任前一個月、即十二月就可以購買物資，並將所花費用計入翌年一月開支，更加容許議員可以預支最多七萬元租用辦公室或購買物資，好似電腦、文具等，但點知今年竟取消有關政策，仲話相信十八區情況都一樣，直斥係政治打壓喎。
新任議員咩都冇
我哋問番Andy情況係點，佢就話其實舊議員就影響不大，因為本身有辦公室同設備，最慘係啲新任議員，佢哋咩都冇，仲話開設辦事處要萬八元租金，連按金就要三萬多元，而電腦影印機都萬幾二萬元，但依家話取消呢個預支政策，真係麻煩喇，話好難唔令人覺得係政治打壓囉。