政情：懶理社會立立亂 高官聖誕放大假

政府尋日刊登憲報，指多名政府高官將於聖誕節期間放大假，其中陳茂波就由尋日下午開始放大假，去到十二月三十日先至返工，即係放九日半，期間由財經事務及庫務局局長劉怡翔兼任財政司司長職務。政府早前先推出完幾輪紓困措施，都仲未見成效，但陳咁快就走咗去，唔通佢諗住咁就已經交咗功課？

有網民近日已經開始號召，喺聖誕節同除夕期間再次上街，分分鐘又堵路，交通大癱瘓隨時再上演，就算冇示威，假期多咗人出街，交通一樣都需要有特別安排。之不過陳帆似乎就冇有怕，事關佢亦揀咗聖誕節期間放大假，由下周一（23日）開始放假，期間就由運房局副局長蘇偉文兼任局長。而陳帆同陳茂波一樣，都係到本月三十日先復工，就咁完美避開咗要喺平安夜同聖誕節呢段時期返工。

劉江華最長 放到明年

而陳茂波同陳帆都未算梳乎，因為放得最長大假嘅係劉江華。劉由前日（19日）已經開始放假，會到明年一月二日先至返工，期間就由民政局副局長陳積志兼任局長職務。換言之劉喺聖誕節、除夕同元旦都唔使返工，真係難為陳積志喇。

至於之前一直被追問催淚煙同埋水炮車藍色水劑成分有冇害嘅食物及衞生局局長陳肇始唔知係咪被追到氣咳，都要抖一抖。陳就會喺下周四（26日）先至放假，直到本月三十日回任，食衞局副局長徐德義期間會兼任局長。而勞工及福利局局長羅致光亦都同陳一樣會放四日假嚟個小休，由平安夜（24日）開始放假，下周六（28日）就會復工。

政府一直被批評止暴制亂不力，本港經濟已經大受影響，紓緩措施又慢過人，市民同中小企都叫苦連天。一眾高官未做好職責就去放假，市民旨意佢哋真係嘥氣喇。