中環出更：突退出兩委員會 容海恩：唔關BB事
已育有一女嘅立法會議員容海恩（Eunice）再度懷孕，預料明年一月就會誕下第二個BB。雖然Eunice即將分娩，但依然冇停過議會工作，今個月初仲角逐立法會保安事務委員會副主席兼當選，期間仲爆出民主派議員毛孟靜（毛婆）涉歧視孕婦風波，連平等機會委員會都出聲斥責毛婆。不過，尋日Eunice就突然退出立法會兩個事務委員會，究竟係因為乜嘢原因呢？
Eunice尋日分別去信立法會衞生事務委員會主席蔣麗芸，以及人力事務委員會主席何啟明。佢喺兩封信中都指出，鑑於議會職務日益繁重，希望重新調整議會工作安排，所以就決定退出有關事務委員會。其實喺立法會多個事務委員會正、副主席選舉完結後，建制派議員都紛紛退出部分事務委員會。Eunice依家先退會，究竟係點解？唔通佢開始要花多啲時間準備迎接小生命？
希望更專注其他工作
Eunice就話，其實佢只係希望可以更專注喺其他事務委員會嘅工作，並唔係因為生BB嘅原因，仲話雖然依家退出咗兩個委員會，但如果日後有關注嘅議題，佢都會喺委員會提問咁話。
卓妮