中環出更：仇多明呻單車選手 缺大賽機遇
參加環法單車賽係每個單車運動員夢寐以求嘅事情，但參賽資格審查嚴格、贊助費高昂、單車選手嘅體力同良好身體素質等都係決定因素。前香港單車隊代表仇多明早前出席一個慈善單車賽活動時慨嘆，本港有好多有潛力嘅單車選手，但因為職業世界商業化，令到單車選手即使有潛力，都未必有機會可以出賽。
仇多明當日一邊做賽前熱身，一邊大吐苦水，話本港有好多單車選手都有潛力參加環法單車賽，但都因為種種原因而失去去外國大展拳腳嘅機會。佢又提到，單車選手要同時訓練場地賽事同公路賽事，但本港單車徑不足，選手好難搵到地方訓練︰「香港單車徑最多得二百公里，環法大概係三千五百公里。」加上職業賽都好商業化，需大量資金贊助車隊，好多時就因為缺乏資金同場地等，令好多人才得唔到機遇。
莫錦貴：細個要用單車幫手送貨
單車係比賽項目之餘，亦可作代步工具，元朗區議會主席沈豪傑都想推廣單車轉乘，以解決環境同交通擠塞問題。佢又話，如果喺西鐵站外增設單車車位，市民就可以從屋企踩單車去西鐵站，唔使動用機動車輛喇。而同場嘅鄉議局副主席莫錦貴話，佢細個嗰時屋企經營街市，要幫手用單車送貨，當年有啲同學亦會踩單車返學。問到點解共享單車行唔通，佢就認為依家單車價格唔貴，普通一架單車先幾百元，共享單車訂金太貴，所以根本冇需求喎。
今次慈善活動籌委會主席單偉彪就較少踩單車喇。佢話本港雖然地方細，但市民始終需要戶外活動空間，佢都希望可以透過今次活動，畀大人細路一齊參與。不過佢都有呻話場地申請過程好困難，因為本港好多隧道同橋都唔允許單車行駛，所以揀地方搞活動都好頭痕喎。
卓妮