政情:答極都唔到題 陳百里被嗌精簡啲

話說工業界議員吳永嘉尋日喺立法會大會質詢政府點樣協助港商發展對外經貿關係,但商務及經濟發展局副局長陳百里回應時好長氣,講嚟講去答唔到正題,搞到立法會主席梁君彥要催佢同精簡啲回答。

催咗兩次先回應港商搬廠優惠

吳永嘉話因為港商搬遷工廠需要大量資金,問政府會唔會考慮設立基金或支援貸款,幫助港商將生產線由中國大陸搬到一帶一路沿線國家,而陳百里就開始長篇大論咁話國家喺一帶一路設立咗好多經貿合作區,又話局方上月同商務部亦喺相關嘅專責小組中,討論點樣協助香港企業進駐云云,跟住梁君彥就打斷佢發言,提醒佢,議員問題係有冇基金可以幫到企業。

陳百里就答有,話政府會同各地政府積極商討合作,畀轉移生產線嘅港商,喺稅務等待遇上可以同當地廠商睇齊,又話港商唔單止有當地政府畀嘅稅務優惠,亦都可利用香港政府提供嘅支援,呢個時候,梁君彥第二次打斷佢發言,再度提醒佢問題係香港政府有無優惠畀港商用嚟搬遷工廠,並唔係當地優惠,要求佢簡單回答,佢再話政府上星期撥出嘅款項可以畀廠商請人同買機器,而搬廠同樣適用。

第一手消息請下載on.cc東網iPhone/iPad/Android/Windows Phone Apps