政情：一煲牛腩 廖長江林卓廷破冰
建制派同泛民主派喺立法會議事廳唇槍舌劍，呢排泛民更加喺各事務委員會選舉正副主席時拉布，搞到建制派一肚氣，但尋日建制同泛民竟然上演一幕破冰嘅場面喎。唔通係大和解？
話說立法會尋日突然出現咗一架美食車，成大煲熱辣辣嘅牛腩拎上嚟，原來係民主黨（白鴿黨）議員林卓廷見天氣凍，親自整咗啲柱侯牛筋腩同蘿蔔，係跟阿一鮑魚嘅老細個食譜整嘅，仲專登將口味調校得淡啲，又叫工人姐姐去咗牛腩嘅肥膏同飛飛水先再煮，足足炆咗四個鐘。
立會飄香 緩和緊張氣氛
咁啱佢嘅黨友黃碧雲（一舊雲）出走廊，即刻行埋去試食，仲大讚煮嘢嘅男人特別有魅力，而阿廷就特登揀舊牛筋醒一舊雲話有骨膠原喎。
黨友支持唔奇怪，就建制派「班長」廖長江行過都話牛腩好香，話轉頭返嚟食，其後廖長江真係轉頭返嚟拎，仲不停話好香好香，仲拎埋入宴會廳加餸添！嗱！近排建制同泛民關係咁緊張，就因為牛腩而破冰嘞！唔知泛民之後喺立會仲有乜嘢動作，希望廖長江食咗阿廷啲牛腩，唔會背脊骨落喇！