政情：功能界別顛覆選情 反對派狂開空殼工會 工聯會出招抗衡

籌備「和你開工會」 嘅網民表示特首喺二○一七年選舉時有七百七十七票，經過泛民喺今屆區議會大勝，如果工會票數再跌六十票，就會跌剩六百票，失去選委會控制權，因此呼籲市民喺出年五月二日前成立工會，標榜金錢成本接近零。網民仲教埋市民點樣成立工會、成立工會有乜嘢手續同埋工會會章需知添！唔知會唔會劍指埋現時為建制派把持嘅三席立法會勞工界議席呢？

分拆大工會 跟足規例交文件

有工聯會知情人士就話佢哋未擔心出年嘅立法會功能界別選舉，因為即使新開嘅工會，都要至少運作一年先可以有投票權，佢哋反而比較擔心二○二二年嘅行政長官選舉委員會委員問題。另外為應付網民成立嘅大量工會，工聯會都有計劃倣效，同樣搞多啲工會出嚟對抗，最直接增加數目嘅方法就係將原先人數眾多嘅大工會分拆出嚟，好似將有三萬個會員嘅汽車交通運輸業總工會，可以分拆成泥頭車、貨車，甚至每間巴士公司一個工會咁仔細。

另外，分拆工會後都要做好管理工作，因為突然多咗咁多個工會主席出嚟，亦需要協調班主席嘅職能同定位，誰大誰細，而維繫工會成員嘅工作都好重要o架，唔可以搞完個工會出嚟但唔理班委員，保持工會嘅凝聚力先可以發揮工會作用o架嘛！

誰大誰細 協調工作有排搞

有熟悉工會運作人士話，搞工會唔簡單，好似每年交一疊文件，包括工會成員名單等，預備啲文件好煩o架，可能過唔到勞工處職工會登記局呢一關，所以未來都會監察唔同工會運作。睇嚟工聯會會長吳秋北真係有排諗計仔點應對喇！