中環出更:黃碧雲話人離題 梁君彥寸「我都忍得耐」

立法會大會尋日辯論解除社會福利界邵家臻嘅立法會議員職務,議員何君堯就話「抱住好沉重嘅心情發言」,跟住一時叫其他議員唔好笑咁大聲,一時又講到區議會選舉,之後民主黨(白鴿黨)議員黃碧雲(一舊雲)睇唔過眼,就向立法會主席梁君彥投訴話何君堯講到離題,點知梁君彥竟然躁底,話「我都忍得好多議員好耐啦!」擺明係寸一舊雲喇!

起初,何君堯話做錯嘢就要承擔後果,呼籲民主派議員唔好為咗政治立場撐邵家臻,話「魚與熊掌不能兼得」,叫大家撐公義。但同時佢又話其實自己咁講嘢好冒險,因為同日下晝自己都要面對譴責動議,需要朋友撐自己。

梁突躁底 一舊雲即坐低

講講吓,何君堯無啦啦就講到區議會選舉,呢個時候一舊雲就提規程問題,話何講到離晒題。咁啱梁君彥喺同一時間都呼籲何唔好離題,就答一舊雲「你一起身我就已經講咗啦!」一舊雲可能諗住拎番個尾彩,話「主席你都忍咗好耐,其實大家都係」,但梁君彥突然躁底話「我都忍得好多議員好耐啦!」跟住一舊雲就即刻坐番低,唔知係咪知衰呢?

經過一輪火藥味咁重嘅對話之後,何君堯就醒目啦,即刻同梁君彥講「主席海量,其實我只不過離題一分三十秒,其他嘢都好relevant(相關),有時黃碧雲議員鍾意聽表面嘅嘢,內涵就忽略咗啦。」

卓妮

第一手消息請下載on.cc東網iPhone/iPad/Android/Windows Phone Apps