中環出更：李振業：科技重新拉近人際距離
若果城市設計加入科技元素，相信對市民就更加方便。卓妮早前去咗一個名為「智在創城--城市化創新挑戰賽」，同啲技術人員及得獎者傾偈，聽吓佢哋點樣將智能科技運用喺城市設計上。
呢個比賽嘅主辦單位係B4B Challenge，卓妮同主席李振業傾過，佢話細個嘅時候條街黑麻麻，汽車同行人縱橫交錯非常危險，但時代進步街道有完善規劃，路燈同交通燈裝置都多咗，就算小朋友自己出街都好安全。
可超越空間聯繫情感
佢話細個時人情味濃，但經過城市發展之後人同人嘅距離遠咗，到近呢幾年科技又重新令人同人之間又拉近番，以前返到屋企閂埋門就唔會見到其他人，但依家用智能電話，無論你搵嘅人有幾遠都可以面對面傾偈，物理上係遠咗，但情感上係拉近咗咁話，佢仲話最重要係社會發展畀唔畀到呢種感覺人去生活。
其中一隊得獎隊伍由科技大學嘅學生顏煒彤同理工大學學生梁鎮顯嘅團隊組成，佢哋話眼見城市發達愈嚟愈先進，但同時衍生出空氣污染問題，所以佢哋嘅作品都係用綠色建築概念為主，希望帶出人同植物可以互動，人類都可以為環境出一分力，團隊嘅設計係將活動平台地下裝置感應器，當市民經過踩到地下裝置後，用人力來發電，供電力給花園感應器，監察植物水分是否足夠，再啟動無人機去灌溉。
建築科技專家李仲謙同建築師黃啟聰擔任評審。李仲謙話科技帶到城市裏面都係一件好事，自己去過好多地方去觀察科技城市，其中日本同國內某啲城市喺呢方面都做得非常好，香港近年都好注重科技城市化，但喺呢方面就仲有好多進步空間。
卓妮