修例風波持續近六個月，打殘咗香港嘅經濟，財政司司長陳茂波（波叔）日前推出第四輪嘅紓困措施，主要係針對小商戶，幫佢哋交水電費，又話減免差餉，但業界嘅反應都係話小恩小惠、細眉細眼，事關租金先係佢哋嘅最大開支，再加上減差餉都只係益咗業主。老實講，立法會財務委員會依家仲係審議緊波叔喺八月提出嘅首輪紓困措施，已經事隔四個月，唔知第四輪幾時先排上議程，亦唔知幾時先過得到，拖得嚟可能啲商戶都執晒笠喇，仲話救亡喎。
