政情：大嘥鬼宣傳環保誤墮政爭 網民：幾時同黃錦星割席

枱布被指似生命麵包

早前有人發起齊食麵包快閃集會，不滿有警員諷刺理工大學示威者食「生命麵包」。咁啱環境局將耶穌同十二門徒嘅《最後的晚餐》畫作二次創作，變咗大嘥鬼分身坐喺鋪咗藍白格仔枱布嘅枱前食嘢。唔少網民留言支持自備餐具，但有網民扯到催淚煙殘留化學物質喺社區，仲翻黃錦星舊帳，話「警察催淚彈放題， 市民點環保都冇用啦。局長仲話燒垃圾有二噁英」。

修例風波令社會撕裂，分為藍、黃兩個陣營，有網民話睇到張枱布就明白，隨後另有網民話「生命麵包藍o架喎」，之後大嘥鬼作者回應話「唔知大家知唔知，當年達文西畫呢幅畫嗰時，係用左（咗）一種好實驗性嘅蛋彩壁畫畫法，以蛋黃為基材黎（嚟）當顏料，都算係廚餘再用嘅先鋒」，隨即有網民即刻反問「你想講呢幅圖係黃？」

咁多大嘥鬼聚埋一齊，有網民留言質疑「非法集結？」亦有網民話「請問催淚彈有冇得回收呀？使唔使問你老竇黃錦星呀？」另有網民更問「大嘥鬼幾時同黃錦星割𥱊（席）？」環保走塑竟變咗政治議題，究竟揀呢張枱布係有心定無意？