中環出更：立會凍到似雪櫃 鄭松泰變身柴犬禦寒
話說近日天氣又凍咗，唔少人為咗禦寒都開始出動保暖衣物喇。通常大家都會戴頸巾、冷帽等等，不過立法會議員鄭松泰就有獨特嘅禦寒方式，就係變身做隻柴犬喇！話時話，立法會大會就嚟辯論有關譴責佢行為不檢嘅動議，佢覺得咁凍，係咪諗起都心寒，凍上加凍呢？
見天氣開始轉涼，立法會大樓嘅冷氣亦將會喺今日轉為冬季模式。據立法會文件，議員辦事處同埋秘書處嘅分格式辦公室使用者，可以用溫度調節器調校其辦公室嘅溫度至攝氏十八至廿二度。不過尋日嘅最低氣溫去到十二度，但立法會大樓嘅冷氣要今日先轉到冬季模式，所以班議員要捱住凍先喇！
議員辦事處位於立法會大樓十樓嘅鄭松泰，尋日就呻議辦似雪櫃咁凍，仲話早知拎張被返立法會添！喺咁凍嘅情況下，佢就喺Facebook上話自己着晒所有衫上身。咁點解會柴犬上身？事關佢將朋友送嘅柴犬外套都着埋，仲影埋相放Facebook添。
或對譴責動議心寒
講開又講，立法會大樓喺七月一日受到反修例示威者佔領及嚴重衝擊，鄭松泰當日身處大樓內，其後涉嫌「串謀刑事毀壞」被捕後獲釋，而議員容海恩就提出譴責鄭松泰動議，指鄭喺七一在大樓內嘅行為屬於行為不檢，而有關嘅譴責動議就嚟喺大會辯論，係咪諗起都心寒呢？
卓妮