中環出更：交通阻塞險累長者捱餓 黃國權感謝義工徒步送飯盒
香港有唔少長者需要支援，而慈善機構「愛心飯團」就會定期向老人家派飯，創會會長黃國權（權哥）就講起佢哋上個月有一個派飯日子，交通受阻令到啲車運唔到飯盒去派飯點，而合作緊嘅中學亦打嚟話班學生都係因為咁而嚟唔到，好彩多得班義工徒步運送呢啲飯盒，嗰班有需要嘅老人家先可以收到呢啲愛心飯盒。
幾年間，「愛心飯團」嘅派飯日數由每星期一日變到依家每星期有四日，但永遠名譽會長李文偉話有一樣嘢咁多年都無變，就係班老人家仲係會一早嚟到排隊，所以佢哋會諗埋中途去廁所嘅安排方便班老人家。佢話依家同緊啲中學合作搵埋班學生幫手一齊派飯，而佢哋仲會畀番獎學金間學校。
周諾蘊：回收商維修輪椅再捐贈
理事周諾蘊形容「愛心飯團」係物資分轉平台，唔單止派飯盒，佢哋仲會轉贈一啲公司臨近過期嘅飲品等等，最特別嘅係佢哋會徵集輪椅。佢提到其中有一張輪椅係嚟自派飯點附近一間回收公司，回收商負責人收到一張壞壞哋嘅輪椅之後親自做維修，再將呢張可以再用嘅輪椅捐畀佢哋幫人，令佢非常感動。
另一名理事馮麗華就講到班義工同班老人家好好感情，有時當佢哋去長者屋企做家訪嘅時候，班老人家唔單止會準備好多飲料畀佢哋，好多時班公公婆婆更加會傾到唔捨得畀佢哋走。佢講番自己早排去咗美國一個星期去唔到派飯，返到嚟更加畀班公公婆婆捉住問佢點解唔見咗！
馮麗華：做家訪傾到唔畀我哋走
唔講唔知，勞工及福利局副局長徐英偉以前都喺呢度做過義工幫手派過飯！佢話入咗勞福局之後無幾耐就知道有呢個活動，就決定咗要嚟幫吓手。以前「愛心飯團」嘅固定派飯日係星期一，佢回憶起試過有一次臨時知道無咗星期一嘅例會，就第一時間打畀權哥話畀佢知，自己可以嚟到幫手添！
卓妮